اسكتش احد توما من الخماسين المقدسة
احد توما
اسكتش احد توما مناسب لمراحل ابتدائى واعدادى وينفع تعملوه اونلاين او فى الكنيسة لجميع مدارس الاحد
والاطفال يتعلموا يعنى ايه ايمان وطاعة .
يدخل بطرس ويوحنا
بطرس : يا يوحنا يا يوحنا
يوحنا: ايوه يا بطرس فى اى
بطرس : اتاكد يا يوحنا ان احنا قفلنا كل الابواب عشان محدش يدخل علينا خالص
يوحنا : حاضر يا بطرس
يطمئن على الأبواب مقفولة كويس
يوحنا : ايوه يا بطرس تمام الابواب مقفولة خالص واحنا كلنا مجتمعين فى العلية عشان محدش يدخل علينا بس مش معانا توما هنا مش عارف راح فين نهارده
بطرس : خلاص تمام يلا ندخل نشوف باقى التلاميذ جوه
يدخل بطرس ويوحنا ويجد باقى التلاميذ قاعدين
بطرس : متاخفوش احنا قفلنا كل الابواب خالص عشان محدش يخش علينا ومحدش يعرف يدخل خالص
يوحنا : ياترى هنعمل ايه دلوقتي يا بطرس هنعمل ايه
بطرس : نستنى يا يوحنا نشوف اى اللى يحصل
فجأه يدخل المسيح ليهم
يوحنا : شايف يا بطرس مين اللى ظهر فجاه ده يااه انا خايف
بطرس : ياااه مين ده ياترى يمكن روح ولا اى اللى جاى علينا ده
المسيح : سلام لكم ما تخفوش انا الرب يسوع تعالوا بصوا عليا انا جسمى حقيقى اهو ليا لحم وعظم زى الناس انا قومت من الاموات زى ما قولتلكم
بطرس : ايوه صح ده الرب يسوع احنا فرحانين خالص خالص انك قومت من الاموات عشان انت قادر على كل شئ
يخرج الجميع ويدخل بطرس ويوحنا وتوما معهم
بطرس : ادخل ادخل يا توما بسرعه عشان هنقفل الابواب
توما : حاضر يا بطرس يلا بسرعه اقفل الابواب ورايا
يقفل الابواب ويدخلوا يقعدوا
يوحنا : انت عارف يا توما الاسبوع اللى فات كنا قاعدين زى كدا وفجأه حصلت حاجه غريبه
توما : حاجه غريبه اى احكولى بسرعه
يوحنا : كنا قاعدين كدا وخايفين وفجأه ظهر لينا الرب يسوع وقال السلام لكم
توما : اممممم وبعدين
يوحنا : وبعدين فرحنا خالص وكمان كنا مبسوطين خالص وهو معانا مرة تانى
توما : اممممممم
بطرس : شكلك مش مصدق يا توما صح ولالا
توما : ايوه يا بطرس انت عارف انا مش بصدق بسرعه كدا لازم اتاكد كمان من اى حاجه
بطرس: تتأكد ازاى يا توما
توما : لازم يا بطرس عشان اتاكد اشوف مكان المسامير اللى فى ايدين الرب وكمان مكان الحربه
بطرس : اممم اكيد الرب هيجى لينا تانى وتتاكد يا توما
تعال ندخل جوه للتلاميذ ونقعد معاهم
يخرج ويدخل فى وجود باقى التلاميذ
بطرس : اهو يا توما كل التلاميذ اللى هنا شوفنا
توما : ايوه يا بطرس بس انا مش هصدق غير اما اشوف اثر المسامير والحربه انا مش بصدق بسرعه يا بطرس
يدخل ليهم المسيح فجاه
بطرس : بص بص يا توما اهو الرب يسوع ظهر اهو وجاى عليك
الرب يسوع: تعال يا توما قرب عليا تعال
توما حاضر يارب
الرب يسوع: بص كدا يا توما اثر المسامير وحط ايدك عند مكان الحربه
توما : يااه ربى والهى انا مكنتش مصدق خالص كدا انا صدقت انك قومت من الاموات وفرحان خالص
الرب يسوع: عشان انت يا توما مكنتش مصدق
طوبى للذين امنوا ولم يروا يعنى با بخت الناس اللى امنت ومشافتتش
بطرس : شفت يا توما اهو الرب ظهر وكمان شوفت مكان المسامير والحربه
يتكلم بطرس ويوجه نظره للاطفال
عشان كدا يا حبايبى لازم نؤمن ان ربنا معانا فى الكنيسه وهو فى وسطينا فى القداس ولازم نقعد هاديين ومنعملش هيصة ومناكلش فى الكنيسه ونرمى الزباله فى الارض وكمان نحترم القداس ومدارس الاحد ومنعملش صوت ونسمع كلام بابا وماما فى البيت عشان بابا يسوع شايفنا وبيبقى مبسوط خالص اما نسمع الكلام ونبقى اطفال حلوين
يلا بقى سلام هنسيبكم دلوقت اخرستوس انستى