اسكتش احترام الكبير والبيت
اسكتش مناسب لحضانه ومراحل ابتدائى عن احترام الكبير وكمان احترام الأخوات فى البيت مينفعش نعلى صوتنا على حد اكبر مننا .
الشخصيات المدونة فى الاسكتش
شخصية الاب والام - شخصية مارينا - وشخص اسمه ابرام .
الاهداف المتعلقة بالاسكتش لاحترام الاخرين
1- احترام الكبير ولا نرفع اصواتنا على الاخرين .
2- يجب التعلم ان نقول اسلوب الاعتذار انا اسف واسلوب الشكر شكرا واسلوب الطلب لو سمحت .
3- نتعلم فى احترام الكبير ان نسمع الكلام ف البيت .
بداية الاسكتش
((( احترام الكبير )))
مارينا : يا ابرام ممكن لوسمحت توطي صوت التليفزيون اللي بتسمعه دة علشان مش عارفة اذاكر منك خالص
ابرام : لأ مش هاوطيه .. هو كدة .. عاجبك ولا مش عاجبك ؟؟
الام : غلط كدة يا ابرام دى اختك الكبيرة و لازم تحترمها
ابرام : لا يا ماما مش هاحترم البنت دى ومش هاوطي التليفزيون .. هو كدة .. وانا مش باخد اوامر من حد
الام : وكمان مش بتسمع كلامى انا كمان !!
وحتى الميسات في مدارس الاحد بيشتكوا منك علي طول !! .. لا الموضوع دة مايتسكتش عليه ابدا .. انا لازم اقول لبابا علي كل حاجة انت بتعملها دى لما يرجع .
ابرام : قوليله عادى انا مش بخاف من حد
الام : بقي كدة !! طيب ماشي .
(يدخل الاب )
الاب : في ايه يا ابرام صوتك عالي كدة ليه انا سامعه وانا تحت .. مش قولتلك بلاش الصوت العالي .
الام : وكمان مش بيحترم امه ولا اخته الكبيرة .. و حتى الميسات في مدارس الاحد اشتكوا منه .
الاب : بقي كدة يا ابرام .. خلاص انت محروم من المصروف لمدة شهر .. ودة غير انك محروم من العجلة اللي كنت هاشتريهالك .
ابرام : خلاص يا بابا انا اسف .. معلش بلاش تحرمنى من المصروف والعجلة .
الاب : لا لا لا خلاص يا ابرام .. علشان تتعلم بعد كدة تحترم مامتك واختك الكبيرة والمسات بتوعك .
( يخرج الاب والام و مارينا )
ابرام و بعدين بقي .. كل الناس كدة زعلت منى .. وبصراحة انا فعلا غلطان .. انا لازم اصلح غلطي .. اعمل ايه بقي ؟ اعمل ايه ؟ .. انا هاروح اعتذر لمارينا اختي .
ابرام : يا مارينا .. يا مارينا .
مارينا : نعم يا ابرام .
ابرام : كنت عايز اقولك انا اسف يا مارينا .. ماتزعليش منى .. وانا مش هاعمل كدة تاني.
مارينا : خلاص يا ابرام انا سامحتك .. بس اهم حاجة دلوقت انك تروح تعتذر لبابا وماما .
ابرام : ايوة انا لازم اعتذرلهم دلوقت .. وكمان هاروح اشترى هدية لماما وهدية لبابا بالفلوس اللي كنت محوشها .
مارينا : برافو عليك يا ابرام .. علشان ربنا قال
(اكرم اباك وامك ) يعني لازم تسمع كلامهم وتكون ولد مطيع و ماتزعلهمش .
ابرام : عندك حق يا مارينا .
(يطلع يجيب الهدايا ويرجع )
ابرام : يا بابا .. يا ماما .. انا اسف علي كل الحاجات الوحشة اللي عملتها وانا بوعدكم انى هاكون ولد مطيع و اسمع الكلام و كمان هاحترم كل اللي اكبر منى .
الاب : برافو عليك يا ابرام .. خلاص انا سامحتك وعلشان كدة هارجعلك المصروف تاني .
ابرام : شكرا يا بابا .. طيب والعجلة ؟
الاب : لا العجلة دى بقي لما اتأكد الاول انك خلاص اتغيرت
ابرام : حاضر يا بابا .. اللي تشوفه .
وانتوا كمان يا اصحابي لازم تحترموا ماما وبابا و المسات وكل اللي اكبر منكم علشان تكونوا شاطرين باي باي .
الاسكتش تاليف خدام كنيسة العذراء منفلوط الرب يعوض كل من له تعب فى الخدمة.