إسكتش القسيس والقديس الاصدقاء الاربعة
(يالا نروح الجامعه او الاصدقاء الاربعه)
ااسكتش مناسب لحفلة رأس السنة مناسب لمراحل اعدادى وثانوى فأعلى لتقديم التوبة ومعرفة الحقيقة والوضع الصحيح احترامنا لكلام ربنا والكنيسة هدفنا وواضح.
اهداف الاسكتش
1- عدم التريقة على الكنيسة او الخدمة او الصلوات .
2- التوبة فى كل وقت وحساب النفس .
3 - محبة الاخرين ونتمنى الخير لكل الناس .
مقدمة عن الاسكتش
اسكتش كوميدى دينى طريف فى الجامعه ربما اشخاص تتمنى تبقى قديسين او يكونوا كهنة لكن الطريقة والمعرفة مش كافية وجود التهاون والاستهتار بالمقاسات خطأ كبير .
التوبة هدفنا فى الاول والاخر بداية طريق جديد.
بداية الاسكتش
يدخل صموئيل وهو يرنم ترنيمة بصوت جهولا .. يدخل مراد فيفاجأ صموئيل
صموئيل إيه يا عم .. هو إنت .. مش تقول .. خضتني
مراد أه يا صموئيل .. أنا يا خويا .. مالك .. فيه إيه؟؟
صموئيل تعبان يا مراد يا خويا..
مراد إنت بقالك إسبوعين مش مظبوط .. إيه يالا .. بتحب ولا إيه؟؟
صموئيل نعم .. هي دي خلقة تتحب .. بتتريق عليّ ... أصل أنا بصراحة يا مراد يا أخويا ..
مراد أيوة .. مالك..
صموئيل بصراحة كدة .. بصراحة .. عايز أبقى قديس
مراد هاهاهاهاهاهاي ... عايز تبقى إيه...؟؟
صموئيل قديس .. دا أنا حتى لابس لبس مارمينا أهو بص...
مراد هاهاهاها .. إنت تبقى قديس .. إنت ؟؟ إنت ؟؟
صموئيل إيه مالك .. ؟ في إيه يعني ..؟ إنت مافكرتش في الموضوع دا قبل كدة..؟؟
مراد لأ طبعاً .. قديس .. يا ابني.. بس عارف يلا يا صاصا .. أنا نفسي أبقى ...
صموئيل أيوة .. ها..؟؟
مراد نفسي أبقى ... قسيس
صموئيل هاهاها إنت .. إزاي .. بأمارة إيه .. يلا دي خلقة قسيس دي ..؟؟
مراد يا سلام يعني دي خلقة قديس دي ..؟؟
صموئيل أيوة قديس..
مراد بأمارة إيه .. بأمارة سهر الليالي مع الواد جودة كوتشينة .. ودوحة روشنة .. كل يوم على القهاوي..
صموئيل عارف إن جودة كوتشينة .. ودوحة روشنة .. إن شاء الله إن شاء الله .. أول بس ما ربنا يفتح عليّ وأبقى قديس كدة . إن شاء الله من غير مقاطعة بقى هايبقوا تلاميذي في النسك والتبشير..
مراد هاهاهاهاهاها ياسلام .. ولما تيجي تصلي تقول بشفاعتهم وتقول يا رب بشفاعة القديس جودة كوتشينة .. ودوحة روشنة..
صموئيل آه وماله .. وبعدين أنا يوم ما هابقى قديس هافضل في الرايحة الجاية طول ما أنا ماشي أصلي وأقول .. تكلم يا رب لأن عبدك سامع .. تكلم يا رب لأن عبدك سامع..
مراد صموئيل صموئيل
صموئيل ربي وإلهي .. ربي وإلهي ..!!
مراد يالا فوق ...
صموئيل إنت بتتريق عليّ وتقطمني يلا يا مراد ..؟؟ ماشي ماشي .. براحتك براحتك .. بس خد بالك بقى .. إنت بقالك كتير بتتريق عليّ وأنا مش راضي أحرجك .. بس طالما إنت كدة بقى .. أنا هاحرجك هاحرجك .. بصراحة يا مراد .. إنت ماتنفعش تبقى قسيس ..
مراد ليه بقى إنشاء الله..؟؟
صموئيل مابلاش ..
مراد لا قول..
صموئيل بصراحة .. محدش هايرضى يجي يعترف عندك خالص . علشان إنت بصراحة يعني بصراحة .. راجل معقدها .. أحرجتك صح ؟؟ أحرجتك أحرجتك...
مراد أنا .. أنا .. طيب دا أنا كلي تفاؤل .. دا أنا الأمل نفسه .. دا أنا الناس يوم ما تيجي وتعترف لي ساعتها يابني .. ساعتها بس هاقول يا ابني ماتعيطش .. خلاص .. بس هاقول لك عملت إيه .. إنت إزاي تعمل كدة .. إنت ماتعرفشي إن أجرة الخطية .. موت .. موت .. يابني موت .. موووووت .. موت يا خاطي .. يا خاطي ..
صموئيل ماكنش قصدي يا أبونا .. ماكنش قصدي..
مراد وكمان بتتكلم .. اخرج برة .. أخرج برة .. برة الكنيسة خالص ماتعتبهاش لمدة 3 سنين .. برة .. برة.
صموئيل كدة برده يا أبونا .. الراجل يجي يعترفلك تطرده 3 سنين مش عيب دا..؟؟
مراد بقى كدة .. بقى كدة يا صاصا .. ماشي ماشي .. طيب .. أنا هسألك سؤال واحد .. إنت إزاي عايز تبقى قديس وإنت جسمك مليان بنيكوتين السجاير وزعازيع القصيب اللي كل يوم بتشربها وبتجري في دمك ..؟؟ أقول لك .. بلاش دي .. إنت عندك إنجيل جوة..؟؟
صموئيل عندي أهرام الجمعة جوة..
مراد لأ .. لأ إنجيل .. الإنجيل .. بلاش دي .. إنت عندك إيمان..
صموئيل الله الله .. هو إنت وصلت بيك للدرجة دي يا مراد .. إيمان اللي معايا في الدفعة .. تعرفها منين .. إنطق يلا .. إنطق تعرفها منين..؟؟
مراد لأ لأ .. مش إيمان دي .. الإيمان اللي بيه القديسين عاشوا .. اللي بيه القديس بسطفورس ذهبي الفم نقل جبل المقطم .. عارفه..؟؟
صموئيل أه طبعاً .. جبل المقطم .. اللي جنبه سور الصين العظيم.
مراد أيوة .. ورانا هنا في مدينة الأحلام .. أهو هو دا .. إنت بقى عندك غيمان القديس بسطفورس ذهبي الفم..؟؟
صموئيل وليه الإحراج دا يا مراد .. وبعدين بسطفورس ماكنش لوحده .. دا كان معاه ناس كتير قوي .. كان معاه ذهبي والفم ذات نفسه .. وعلى العموم .. أنا كمان هابقى قديس .. ويبقى عندي إيمان .. وأقول للجبل إنتقل من هنا لهنا .. الله الله .. الجبل وقع الجبل وقع ..
مراد يلا فوق .. فوق .. جبل إيه اللي وقع ..
صموئيل يبقى كدة واحدة بوحدة .. ماشي .. يعني طب قولي إنت بقى إزاي عايز تبقى قسيس . وإنت ماتعرفش حد .. إزاي هاتروح تفتقد الناس في بيتوها علشان يروحوا الكنيسة .. ويحضروا مدارس الأحد والاتنين .. إزاي تروح تفتقدهم ..
مراد يا ابني دا أنا يوم ما ابقى قسيس .. هاروح للناس واحد واحد في بيوتهم .. وأفتقدهم للكنيسة..
قوم يا أخي روح الكنيسة .. قوم يالا يا حبيبي علشان نروح الكنيسة .. قوم يالا يا أخي .. الله ماتقوم بقى يا أخي .. إنت مابتجيش غير بالضرب .. قوم يالا.. قوم..
صموئيل أنا رايح معاك يا بونا ..
مراد طيب يلا يا حبيبي..
مراد المهم .. لو خيروك بين الحياة الـfunny الحياة الـpeace كدة يعني .. وبين حياة الموت .. تختار إيه؟
صموئيل بين الحياة .. وحياة الموت .. إزاي يعني .. لأ طبعاً أنا سعاتها هاختار.. أختار طبعاً ... أنا صاصا الروش طبعاً..
مراد يا صموئيل إنت ليه مش عايز تبخر لآلهتنا العظيمة .. أبو الليف وأراطيس ..؟
صموئيل إزاي يعني أبخرلها .. دي مصنوعة من إيدين بشر .. زيينا...
مراد إنت بتغلط في آلهتنا العظيمة .. أيها الجنود .. خدوه إحبسوه . وإجلدوه على بطنه 4 جلدات حتى تخرج أحشاؤه منه .. تخرج .. تخرج .. وقصوا له رموش عينيه وضوافر رجليه ..
صموئيل لأ لأ بلاش ضوافر رجليا .. هابقى أقصهم أنا ..
مراد شفت هاتبيع المسيح علشان هايقصولك ضوافر رجليك .. كدة برده .. شفت إنك ماتنفعش قديس .. يا ابني القديسين دول ضحوا بحياتهم علشان المسيح..
صموئيل بقى إنت يعني اللي تنفع قسيس .. لأ طبعاً إنت ماتنفعش أساساً تبقى حاجة..
مراد يا ابني إنت إنسان عقيم فكرياً اساساً..
صموئيل إنت اللي ماتنفعش تبقى مسيحي أساساً..
دخول جو
جو هاي سوسو .. باي شيري .. باي شوشو .. بكرة في الكلية .. باي .. عند شجرة مريم هــا..!
مراد أهلاً أهلاً بالدنجوان ..
جو إنتم لسة في اللي إنتم فيه دا .. لسة بتتخانقوا .. طول عمركم هاتفضلوا كدة .. مدفونين بالحياة..
سامح إرجعوا .. إرجعوا .. إرجعوا يا ناس .. خلاص مافيش وقت .. إرجع يا مراد .. خلاص خلاص .. إرجعوا وتوبوا .. إصنعوا سبلاً تليق بالتقوى .. لأنه إقترب ملكوت السموات .. إرجعوا .. إرجعوا..
مراد إرجع يلا .. إرجع يلا إنت وهو ..
جو خلاص خلاص .. رجعنا بس المهم .. المهم دلوقتي .. الـlunch إيه النهاردة علشان أنا جعان طحن..
سامح يا بني هو فيه حاجة بتقعد في الشقة الفقرية دي .. ما إحنا لو عندنا إيمان .. كان الأكل يفيض ويزيد .. ونوزع الباقي على المغتربين اللي في الشقق التانية .. إنما لأ .. توبوا .. توبوا وإرجعوا .. إرجعوا ..
جو توبوا وإرجعوا لتأكلوا .. وتشبعوا .. خلاص خلاص .. أه إفتكرت .. أنا كنت سايب صينية بطاطس في التلاجة إمبارح..
صموئيل صينية .. إيه .. يلا .. صينية .. إيه اللي بتقوله دا..
سامح لأ لأ .. عنك إنت يا صموئيل .. هو صموئيل ما يقصدش طبعاً يحرجك ولا يقصد إن إحنا ماعندناش صواني .. نحط فيها البطاطس .. وبعدين هو فين البطاطس اللي تتحط في الصواني .. لأ لأ يا أخي .. عيش عيشة أهلك ..
جو أه إفتكرت .. طبق الفول .. طبق الفول أيوة .. كدة صح .. الـbeans
صموئيل أيوة إنعدل .. لأ أبداً .. مراد مسح بيه زوره الصبح..
جو إنت مش هاتبطل الحركات بتاعتك دي يا مراد..!
مراد هو بتاعك إنت .. دا أنا كنت فاكره تبع الشقة .. جاي مع العفش .. مع وصل النور مثلاً كدة يعني ..
جو طيب ... شوفولنا هناكل إيه دلوقتي..
صموئيل إحنا هناكل .. هناكل .. فراخ علي حكشة..
مراد معلش يا صاصا .. معلش يعني سؤال أخوي .. يعني .. هو يعني إيه فراخ..؟؟
صموئيل يعني إيه فراخ .. ! أه .. لأ إنتم جهلة بقى .. وإنت برضه مش عارف
جو لا مش عارف
صموئيل ليه يعني .. كدة .. دا الفراخ للجميع .. قصدي القراءة للجميع .. روحوا وإقروا .. أمال ماما سوزان فتحت المكتبات لمين .. ليكم طبعاً .. بص يا ابني إنت وهو .. أنا هاعمل فيكم جميل وأشرحلكم المخلوق اللي إسمه فراخ..
جو فراخ
مراد فرااااااااخ ... أنا نطقتها صح؟؟
صموئيل أيوة بس إبقى ريش بقك وإنت بتنطقها .. بص كدة .. "فراخ" بص يا ابني علشان ماتفضحوناش .. "الفراخ" دي كائن خرافي .. يحكى عنه في الأساطير ... دجاج القدماء .. الفراخ دي قد كدة .. لأ لأ .. ماتجيبش آخره .. دا مالوش آخر ..
سامح عظيم هو الرب .. وممجد على جميع أعماله..
صموئيل ويمشي على 7 أرجل .. 7 وراه و 5 قدامه .. وليه 18 ديل ..
مراد دا جبار قوي
سامح ليتمجد إسم الرب
صموئيل يلا إنت يلا .. إكتم علشان إنت شاب خنيق
جو هو دا اللي رحتوا علشان ترسموه..؟؟
صوئيل أمال إيه .. عندنا في الكلية .. في فنون تطبيقية .. 5 سنين نرسم في الفراخ .. في مادة الطبيعة الخاصة .. وبناخد كورس شهرين مع الكتاكيت..
مراد معلش .. أنا عارف إني قليل الأدب .. معلش .. يعني إيه كتاكيت..؟؟
صموئيل جهلة .. غوغاء .. الكتاكيت كائنات بحرية .. تعيش في البحار..
سامح كتاكيت .. فراخ .. إحنا لازم نصوم .. لازم نتحشف ونتقشف .. لازم نعيش حياة الزهد .. خلاص الباب على الأبواب .. الباب ضيق يا مراد
مراد مالكش دعوة .. أنا رفيع ... أنا هاعرف أعدي لوحدي ..
سامح الباب ضيق يا صموئيل
صموئيل أنا عارف البواب .. هايعديني .. أنا عارفه مالكش إنت دعوة..
جو يا جدعان هناكل إزاي دلوقتي ..؟ ألو يا ميمي .. يا فيفي .. أيوة يا .. مين اللي بتكلم .. أه أهلاً يا طنط .. يا صموئيل كلم مامتك..
صموئيل أيوة يا طنط .. أيوة يا ماما إزيك .. إزاي بابا وإخواتي .. إيه .. شلتوله اللوز .. خير خير .. يلا مش مشكلة .. المهم عامل إيه .. أنا كويس يا ماما .. كويس .. باعمل إيه.. بذاكر .. عايز فلوس يا ماما .. الكتب غالية أوي .. أه عايزين سجاير ..لأ ستاير .. خرطوشة ستاير .. الخرطوشة زي التوب .. بيتفرد لما نحب.. أه عندنا شبابيك كتير قوي.. وأكل يا ماما .. جعان .. تبعتي إيه .. أه إبعتي لي فراخ .. فراااااااااااخ .. سلام ياماما .. ماتنسيش الفراخ
صموئيل خلاص خلاص .. يا شباب المعونة جاية
مراد تسلم يا صموئيل .. تسلم
جو وإحنا هانستنى عقبال ما تيجي من البلد .. دي فيها أسبوع..
سامح الصيام .. خلاص الصيام على الأبواب .. على الأبواب..
صموئيل يلا إسمها المسيح على الأبواب .. أنا لسة قاريها في الخولاجي .. في الأصحاح القبل الأخير..
مراد المهم .. هناكل إيه
جو حرام .. حرام يا عالم
سامح أنا إفتكرت .. أنا لسة رامي طبق فول حمضان في الزبالة من 3 أيام .. إيه رأيكم..؟
صموئيل ودي عايزة كلام .. هاتة طبعاً .. هاته..
مراد فين صيام القديسين..؟؟
جو طبف الفول الحمضان وصلحه
سامح لحظة واحدة يا جماعة .. كله يشيل إيده ... لحظة نصلي ..
مراد طلبت معاه صلاة .. هي طلب دلوقتي ..
سامح اليوم من شهر كيهك أعاده الله علينا باليمن والبركات .. بإسم الله القوي القدير
جو دا هايعمل قداس يا با..
سامح وجاء قوم من الفيوم .. أهو قلتش حاجة .. من عندي أهه من الفيوم ..
جو ييه هيقعد فيها سنة دي
مراد قول يا فيومي قول
سامح أهه الفيوم .. قالكش المنيا .. قالكش أسيوط .. قالكش إسكندرية .. قالك الفيوم ..
صموئيل همّ عرفوا إسمك منين يالا يا سامح..؟؟
سامح شايفين.. أهل الفيوم القديسين الشهداء .. الأقوياء .. شايفين..
مراد الفيومين القدماء ..
جو وبعدين إيه اللي حصل .. كمل خلينا نخلص وناكل
سامح وجاء قوم من الفيوم .. وسرقوا الجسد "إخص .. طلعوا حرامية"
صموئيل يا عم إوعى بقى
جو (يشاور على طبق الفول) إنت سيبته في الزبالة 3 أيام بس..؟؟
مراد طب إبقوا سيبوه أسبوع بعد كدة..
جو ياه الحمد لله .. الواحد كان ميت من الجوع..
صموئيل الواحد ينزل يحبس الأكله دي مع جودة كوتشينة .. ودوحة روشنة..
مراد يا قديس
سامح صلاة الساعة الحادية عشر من النهار المبارك من أسبوع الآلام..
صموئيل يا ابني نام .. نام شوية بقى .. أسبوع الآلام إيه .. دا إحنا لسة كان إمبارح عيد الميلاد ولاالغطاس باين
جو المهم .. هانعمل إيه دلوقتي ..
مراد زي كل يوم .. إفتح التليفزيون نشوف أي حاجة تحرق الدم وخلاص
صموئيل شغل الكاست أي أغنية وخلاص.. ولا اي ترنيمة
جو أنا زهقان من الحاجات دي
مراد وصموئيل وأنا كمان
سامح توبوا .. توبوا وأرجعوا .. توبوا .. صلاة نصف الليل من النهار المباكر .. من مزامير يونان النبي بركاته معنا آمين ..
صموئيل يا ابني ريح شوية إلهي يخليك
جو بقولكم إيه .. أنا هاتصل بالبت بتاعتي أخرج معاها..
مراد على فكرة .. الواد بيكلم واحدة خلاسة أساساً..
صموئيل يا راجل .. خرسة
مراد أمال إيه ..!
صموئيل عرفت منين ؟؟
مراد شفته ماسك إيدها وبيعديها الشارع .. تبقى خارسة ولا مش خارسة..؟؟
صموئيل خارسة
جو خلاص أنا خارج ... عندي رانديفو
صموئيل أنا هانزل على القهوة أشوف العيال
مراد أنا هاقعد أنا واخينا بتاع الطقس دا ولا إيه..؟
سامح قام حقاً قام رئيس
صموئيل إنت مش لسة كنت في أسبوع الآلام.. قوام قومت المسيح..
جو بيني وبينكم أنا زهقان ومش عارف أعمل إيه..
صمويل أنا كمان .. بصوا أنا مش نازل
مراد بصراحة أنا زهقان من اللي أنا بعمله..
سامح رفع بخور عشية بركته معنا أمين .. وإرفع غضبك عنا وأعنا..
مراد مش حافظ حاجة في أوشية الراقدين ولا صلاة التالت .. يعني ممكن نحتاج نصليها على حد ..
سامح يا ابني كلنا ميتين عن العالم .. وإحنا هنا في غربة..
جو يووووووووه .. هانعمل إيه دلوقتي في الـTime الضايع دا ..
صموئيل بصراحة .. أنا بقالي أسبوع بأفكر وفكرت أكتر لما إختلفت معاك يا مراد .. وإتخانقنا .. لما إنت كنت غلطان..
مراد إنت اللي غلط..
صموئيل إنت اللي غلط..
مراد وصموئيل يووووه إحنا الإتنين غلط..
جو لأ لأ..
الكل إحنا كلنا غلط .. صح..؟
صموئيل (لسامح) وإنت معانا يا حلو .. إنت يا بيه
مراد غلطان ولا مش غلطان
جو إنطق
سامح أمين .. أمين .. هللويا .. تي ناهتي . تي ناهتي .. تي ناهتي .. يا بشر
الكل قول غلطان..
سامح غلطااااااااااااااان
جو بس على فكرة بقى اللي يعرف
الكل أبويا يروح يقوله..
مراد لأ لأ يا جدعان .. إحنا لازم نفكر في اللي إحنا فيه..
جو ولازم نفكر في حل للزهق اللي إحنا فيه..
سامح طب نعمل إيه..؟
صموئيل لازم نبتدي .. ونبتدي بخطوة إيجابية في حياتنا..
مراد أيوة لقيتها .. إحنا كل واحد فينا مالهوش هدف..
سامح صح .. كل واحد بيعمل اللي على كيفه..
صموئيل بس بيعمل إيه وليه مش عارف..
جو صح مش مشكلة .. إنك تصاحب وتهزر وتخرج .. بس تبقى عارف بتعمل إيه .. ويبقى لحياتك معنى ..
صموئيل القداسة مش بس اللبس والمعجزات .. صح .. لازم يبقى لحياتك معنى ..
مراد ولا القداسة إن إنت تبقى كاهن . صح .. لازم يبقى لحياتك معنى ..
سامح القداسة علاقة شخصية مع ربنا مش دروشة .. صح .. لازم يبقى لحياتك معنى..
صموئيل صح لازم يبقى فيه هدف
مراد إوعى تبقى ماشي وخلاص
جو إوعى تبقى عايش وخلاص
سامح لازم تفكر في اللي إنت فيه
الكل صح .. لازم يبقى لحياتك معنى .. هدف حياتك إيه..؟؟
الكل حياتك غالية .. لازم يبقى لحياتك معنى ..
مراد إحنا كلنا لازم نبقى رجالة
صاحب الشقة الإيجار يلا يا فيومي .. يلا يا أسيوطي .. يلا يا اسكندراني .. يلا يا بني سويفي .. الإيجار يلا إنت وهو ..
الكل إحنا عيال .. إحنا عيال
منقول من جروبات الخدمة الرب يعوض كل من له تعب فى الخدمة.