اسكتش رحلة العائلة المقدسة إلى مصر
الشخصيات الرئيسية
( الرب يسوع - يوسف النجار - الملاك - القديسة العذراء مريم )
اهداف الاسكتش
1- معرفة قصة رحلة العائلة المقدسة إلى ارض مصر .
2- اهمية وجود ربنا فى حياتنا وحمايته لينا مهما كانت الظروف .
3- الرب يسوع بنفسه بارك ارض مصر واختارها عشان يقعد فيها فترة .
4- لازم نخلى ربنا يسكن فينا زى ما جاء بنفسه ودخل ارض مصر .
5- لازم نثق ان ربنا معانا فى كل خطوة وان كل شئ للخير مهما كان الشر .
بداية الاسكتش
يدخل يوسف النجار لينام
يوسف النجار : ياااه الواحد النهارده اشتغل كتير فى النجارة والخشب وعملت حجات كتير خالص اما اروح انام بقى وارتاح شويه عشان اصحى بدرى اخلص باقى الشغل .
ينام يوسف وفجاه يحلم ويظهر ملاك له .
الملاك : يوسف يوسف
يوسف النجار: مين انت مين ؟
الملاك : متخافش يا يوسف انا ملاك وجاى من عند ربنا عشان اقولك رساله متخافش خالص .
يوسف : خير فى ايه ؟
الملاك : خد الطفل النونو يسوع وامه وقوم اهرب على مصر عشان هيرودس الملك عايز يقتل الطفل الصغير بسرعه وخليك هناك لحد ما اقولك تعمل ايه .
يوسف : حاضر حاضر هقوم بسرعه .
يخرج يوسف النجار والملاك .
يدخل يوسف النجار لمريم العذراء .
يوسف : يا مريم يا مريم .
مريم العذراء : ايوه يا يوسف فى ايه خير ؟
يوسف النجار: يلا بسرعه تعالى نهرب ونروح مصر عشان ملاك جالى بالليل فى حلم وقالى قوم بسرعه واهرب مصر عشان هيروس بيدور على الطفل الصغير وعايز يموته .
مريم: حاضر حاضر هجهز حجاتى واجى بسرعه .
يوسف : ماشى بسرعه لحد ما اشوف الحمار بتاعنا ونجهز عليه الحجات بتاعتنا عشان نمشى دلوقت زى ما قالنا الملاك .
يخرج يوسف ومريم العذراء ويدخل مرة اخرى
يوسف : يلا يا مريم انا جهزت كل حاجه والحمار بتاعتنا جاهز اهو عشان تركبى انتى والطفل يسوع ونمشى بسرعه قبل ما حد يشوفنا يلا بينا .
يخرج يوسف ومريم العذراء
ويدخلوا ويكون الحمار ماشى معاهم .
يوسف النجار : ياااه الطريق صعب شايفه يا مريم احنا عدينا صحراء وطرق صعبه خالص يلا نمشى اهو احنا وصلنا لحدود مصر اول بداية طريقنا لمصر .
يوسف النجار : احنا يا اصحابى وصلنا بلد اسمها الفرمة والفرمة دى بين محافظة العريش وبورسعيد دلوقتى يلا عشان تحفظوهم معانا اول حتة رحنا ليها الفرمة وصلنا اهو اخيرا .
تعالى يا مريم نرتاح شويه وناكل شويه .
يقعدوا يحكوا مع موسيقى دقيقة وبعدين يلا بقى نجهز مكان نرتاح فيه ونصحى نكمل الطريق .
يخرج الجميع ثم يدخلوا تانى .
يوسف النجار : يلا نكمل الطريق يا مريم لينا ايام كتير هنا .
مريم العذراء: احنا طيب هنروح فين دلوقتى يا يوسف ؟
يوسف النجار : ايوه يا مريم احنا دلوقتى رايحين حتة اسمها تل بسطة يلا عشان نوصل ليها قبل ما الليل يليل علينا .
مريم: فين يا يوسف تل بسطا دى ؟
يوسف النجار : تل بسطا دى دلوقتى يا اولادى قريبة على مدينة الزقازيق يلا ندخل نقعد شويه .
يرتاح شويه ثم يخرجوا الجميع .
يدخل يوسف النجار ومريم والطفل والحمار .
يوسف النجار : يلا يا مريم الناس اللى هنا عاملونا مش كويس خالص يلا نمشى ونسيبهم عشان متحصلش مشاكل خالص يلا بينا دلوقت .
مريم : يلا بينا هنروح فين دلوقت يا يوسف ؟
يوسف النجار : هنروح مكان اسمه المحمة والمكان ده هو مسطرد دلوقت يا اولادى يلا يا مريم نقعد شويه وكمان فيها ميه كتير عشان الطفل يسوع يستحمى هناك ونغسل هدومه كويس ونرتاح شويه .
مريم : ايوه صح الطفل يسوع عايزين نغسل هدومه ويستحمى بسرعه يلا نروح عشان كمان نرتاح شوية هناك .
يخرج الجميع وتدخل مريم وبعض ملابس منشوره للطفل وتلم الملابس ويدخل يوسف النجار .
يوسف النجار : يلا مريم احنا لينا فتره طويلة هنا وارتحنا كتير تعالى نكمل باقى الطريق يلا بينا .
مريم : حاضر يلا بينا .
يخرج الجميع ويدخلوا مرة اخرى ويكون موجوده شجره فى المسرح.
مريم : احنا وصلنا فين يا يوسف دلوقت ؟
يوسف النجار: احنا وصلنا لمنطقة اسمها بلبيس دى يا اولادى دلوقتى تبع محافظة الشرقية يلا يا مريم نرتاح شويه يلا بينا .
مريم العذراء : شايف يا يوسف هناك بص كدا
يوسف النجار : ايوه دى شجرة كبيره خالص .
مريم العذراء: ايوه صح تعال يا يوسف نقعد تحتيها شويه عشان الشمس سخنه خالص ونرتاح شويه .
يوسف النجار: ايوه صح دى حلوه خالص يلا نرتاح .
يقعد الجميع يرتاحوا شويه وبعدين يخرجوا .
يدخلوا مرة اخرى .
يوسف النجار: يلا يا مريم احنا لينا زمان هنا تعالى نكمل باقى الرحلة ونشوف حتة تانى .
مريم العذراء: حاضر يا يوسف يلا بينا .
يخرج الجميع ويدخلوا مرة اخرى .
مريم العذراء: احنا ماشيين لينا كتير يا يوسف رايحين فين دلوقت ؟
يوسف النجار: احنا خلاص وصلنا يا مريم بلد حلوه خالص اسمها منية سمنود ودلوقتى بردو يا اولادى اسمها سمنود .
مريم العذراء : شايف يا يوسف فى ناس جايه علينا هناك تعال نسالهم نرتاح عندهم شويه فى البلد دى عشان تعبنا من الطريق .
يدخل احد الاشخاص ويقابل يوسف
يوسف : سلام سلام .
احد الاشخاص : سلام سلام .
يوسف : معلش كنا عايزين نرتاح فى البلد دى شوية .
احد الاشخاص : اتفضلوا اتفضلوا تعالوا ارتاحوا فى بلدنا انتوا ضيوفنا .
يوسف: شكرا شكرا خالص .
يوسف : يلا يا مريم تعالى نرتاح شويه وكمان نعمل اكل ونشرب شويه ميه الواحد تعب من الطريق والمشوار يلا طلعى الاكل .
يخرج الجميع وتدخل مريم العذراء وجالسه بجوار ماجور وتعجن اكل
يدخل يوسف النجار .
يوسف : بتعملى ايه يا مريم ؟
مريم : بعجن شويه عشان نعمل شويه اكل لينا وليسوع الطفل .
يوسف النجار: شوفتى يا مريم اهل البلد دى حلوين خالص وسمحوا لينا نقعد عندهم واستقبلونا حلو خالص وكمان المسيح باركهم وشايفه هناك فى بير مية فى البلد دى المسيح باركها بنفسه عشان الناس اللى هنا حلوين وكويسين وكمان ضايفونا فى بلدهم .
مريم : ايوه صح يلا اروح اجهز الاكل لينا .
ويخرج الجميع
يدخل يوسف : يلا بينا يا مريم احنا ماشيين دلوقت ورايحين مكان تانى
مريم : رايحين فين دلوقت طيب ؟
يوسف النجار: احنا رايحين بلد اسمها سخا وعايزين نوصل هناك نرتاح شويه عشان المشوار طويل .
مريم العذراء : يلا بينا طيب هجهز الحاجات ونمشى .
يخرج الجميع ويدخلوا مره اخرى .
مريم العذراء : يااااه اخيرا وصلنا سخا يلا نرتاح هنا فتره طويله وبعدين نكمل احنا بمنشى كتير كل يوم .
يوسف النجار: ايوه يلا بينا فى مكان اهو تعالى نرتاح فيه .
يخرج الجميع ويدخلوا مره اخرى .
يوسف النجار : يا مريم يا مريم جهزتى الحجات عشان ماشيين ولالا ؟
مريم العذراء : ايوه يا يوسف هنمشى دلوقت رايحين فين ؟
يوسف النجار رايحين مكان اسمه وادى النطرون هنقعد شويه هناك ونكمل رحلتنا هو مكان مش بعيد عننا هنوصل علطلول .
يخرج الجميع ويسمع صوت من الداخل وتعدى الايام كثيرة .
يدخل يوسف النجار ومريم العذراء .
يوسف النجار: ياااه اخيرا وصلنا هنا نرتاح شويه .
مريم العذراء : احنا وصلنا فين يا يوسف دلوقت ؟
يوسف النجار : احنا بعد ما مشينا من وادى النطرون وصلنا المطرية وعين شمس شايفه يا مريم شايفه الشجره الكبيره اللى هناك دى تعالى نرتاح شويه تحتيها وكمان فيه بير ميه نشرب منه ونغسل ملابس الطفل يسوع حاجات كتير فى البلد دى .
مريم العذراء : ايوه صح يلا نقعد تحت الشجره عشان الجو حر خالص خالص ونرتاح شوية من التعب .
يخرج الجميع ويسمع صوت وتعدى فترات طويله ويدخل يوسف النجار ومريم العذراء .
يوسف النجار: ياااه احنا تعبنا الفتره اللى فاتت خالص شوفتى يا مريم احنا مشينا من المطريه ورحنا مصر القديمة وبعدين رحنا مكان اسمه منف اللى هى المعادى دلوقت وكمان كان فيه سلم هناك عند النيل نزلنا عليه وقاعد لحد دلوقت وبعدين عدينا على حته اسمه دير الجرنوس اللى هى مغاغة دلوقت يا اولادى وكمان كان فيه بير هناك شربنا منه ميه حلوه خالص وقاعد لحد دلوقت ومشينا رحنا حتة تانى اسمها البهنسا وبعدين عدينا على سمالوط اللى هو جبل الطير الناس بتزوره هناك كتير خالص والكنيسة هناك .
وبعدين يا مريم عدينا الاشمونيين وباركنا الناس هناك .
وبعدين دخلنا بقى محافظات اسيوط وعدينا على ديروط وبعدين دخلنا قسقام القوصية دلوقت بس الناس طردونا هناك وبعدين مشينا بسرعه رحنا مير دى غرب القوصية يا اولادى والناس كانت حلوه معانا خالص والمسيح باركهم .
وبعدين مشينا بقى الى جبل وصلنا فى المكان ده بقى .
مريم العذراء: ايه المكان ده يا يوسف ؟
يوسف النجار: احنا بعد ما مشينا من بلد مير عدينا جبل قسقام وده وده بعيد 12 كيلو غرب القوصية وهو الدير المحرق يا اولادى دلوقتى ودلوقت طبعا خلاص هنريح شويه كتير خالص خالص هنقعد هنا كم شهر كدا نرتاح شوية .
مريم العذراء : ايوه يا يوسف نرتاح شويه هنا تعبنا خالص من المشوار يلا بقى نخرج ونشوف مكان نرتاح فيه .
يخرج الجميع ويدخل يوسف النجار يجهز الحجات للسفر
مريم العذراء : ايه يا يوسف هنروح فين دلوقت ؟
يوسف النجار: كفايه يا مريم قعدنا كتير هنا احنا يا اولادى قعدنا فى الدير المحرق 6 شهور و10 ايام شوفتوا اد ايه قعدنا هنا وقعدنا فى مغارة حلوه خالص وكلكم ياريت تزوروا الدير الحلو ده وتاخدوا بركة .
مريم العذراء: هنروح فين دلوقتى يا يوسف ؟
يوسف النجار : هنروح بقى درنكة عارفينها يا اولاد ولالا ؟
يسأل الاطفال عارفينها يا اولاى صح كلكم بتروحوا هناك .
مريم العذراء : يلا يا يوسف عشان نوصل بدرى .
يخرج الجميع ويدخلوا مره تانى .
يوسف النجار: اخيرا وصلنا جبل درنكه كفايه كدا يا مريم نرناح شويه هنا كتير احنا ياااه لينا كتير ماشين .
مريم : يلا يا يوسف ارتاح انت من المشوار عشان تعبان خالص
يدخل يرتاح يوسف ويظهر الملاك له فى حلم .
الملاك: يوسف يوسف .
يوسف النجار: مين مين ؟
الملاك: متخافش يا يوسف انا الملاك اللى قولتلك اهرب لمصر خلاص كفايه كدا ويلا عشان ترجع تانى فلسطين بلدكم عشان مات الناس اللى عايزين يموتوا الطفل يسوع .
يخرج الجميع ويدخل يوسف ومريم العذراء .
يوسف : شوفتى يا مريم اللى حصل .
مريم العذراء: ايه اللى حصل ؟
يوسف النجار: الملاك جالى فى حلم وقالى يلا يا يوسف ارجع تانى بلدكم واحنا هنجهز عشان نسافر تانى .
مريم : حاضر با يوسف هنجهز الحاجات ونمشى يلا بينا .
يخرج الجميع ويدخل يوسف النجار .
يوسف النجار: اخيرا وصلنا فلسطين احنا يا اولادى بعد ما مشينا من الدير المحرق مشينا تانى ورجعنا ووصلنا لحد بلدنا وسكنا فى الناصرة ياريت اديا اولادى تكونوا عرفتوا قصتنا وازاى رحنا وهربنا لمصر وعرفتوا الرحلة بتاعتنا كانت ازاى صعبة بس السيد المسيح كان معانا فى السفر عشان كدا يا اولادى لازم مش نخاف طالما بنصلى كل يوم واى حاجه تخوفنا نرشم الصليب ومنخافش من حاجه خالص ونسمع كلام بابا وماما ونسمع كلام اخواتنا والخدام فى الكنيسة ومش نعمل هيصه فى الكنيسة شوفتوا ماما العذراء كانت بتسمع الكلام ازاى وتقول حاضر عشان كدا لازم نسمع الكلام زيها ونصلى ونروح الكنيسة ونحضر القداسات ونتناول ونسمع الكلام علطلول يلا يا اولادى باى باى باى .