اسكتش حنة ويواقيم

اسكتش حنة وزوجها يواقيم

 اسكتش حنة ويواقيم ابوين القديسة العذراء مريم 

من خلال الاسكتش على المخدوم ان يعرف :-

- ان يعرف المخدوم من هو والد القديسة العذراء مريم ومن هى والدة القديسة

- ان يعرف اهمية الصلاة  فى حياتنا ولا نستعجل الله فى امور الحياة وان نترك كل شئ لمشيئته

- ان نوضح له ايضا ان القديسة العذراء مريم لها ايضا اخدت صغيرة اخرى 

- ان يعرف المخدوم اهمية الطاعة فى القصة وانها سبب بركة فى كل شئ وعليه طاعة بابا وماما فى المنزل

نحن نعلم ان والد القديسة العذراء مريم يسمى يواقيم ووالدة القديسة العذراء مريم اسمها حنة حيث لم يكن لهما ابن او ابنة حتى شيخوختهما ولكن عندما اراد الله فى الوقت المحدد من قبله تحنن عليهما وارسل ليهم الملاك واعلمهما بانهما سوف تحبل حنة بابنة سوف يكون لها شأن كبير وهى القديسة امنا كلنا القديسة العذراء مريم التى جاءت واعطت الخلاص لادم وزريته من قبل ميلاد عمانوئيل الذى ليس باحد غيره الخلاص.
تقديم الاسكتش مناسب لمراحل ابتدائى
يدخل يواقيم: ياااه الواحد تعب نهاردة خالص فى السوق ونشكر الرب الهنا ان وصلت للبيت هرتاح شويه
تدخل حنة عليه : ازيك يا يواقيم نشكر الرب انك وصلت بالسلامة البيت عملت ايه نهاردة احكيلى رحت الهيكل ورحت السوق
يواقيم : نشكر الرب يا حنة رحت نهاردة الهيكل وقدمت شويه عطايا من خيرات الرب وعطيت الفقراء اللى قابلتهم هناك عند السوق واحنا لازم نساعد المحتاج
حنة : طبعا يا يواقيم لازم نساعد كل محتاج عشان ربنا اوصنا فى الشريعة ان اى حد محتاج لازم نقدم المعونة ليه ونبقى كويسين معاه اكيد
يواقيم : وكمان قابلت هناك زكريا الكاهن واطمنت على اليصابات بردو وهما كويسين وبيسلموا عليكى كتير خالص وعايزين يجوا يزورونا
حنة : ايوه انا كمان نفسى ازورهم ونقعد عندهم شويه ونصلى معاهم ونقدم كمان عطايا لكل الاهل والقرايب
يواقيم يمشى شويه وهو موطى راسه وحزين
حنة: مالك يا يواقيم زعلان ليه كدا فى حاجه حصلت عند الهيكل والسوق احكيلى فيه ايه
يواقيم : لا مفيش حاجه متقلقيش
حنة: لا فيه ايه شكلك كدا زعلان من حاجه احكيلى مالك فيه ايه اكيد حصلت حاجه زعلتك
يواقيم : هحكيلك انا النهارده وانا رايح عند الهيكل اقدم العطايا لقيت الناس هناك كل واحد جايب ابنه الصغنن معاه ورايح بيه الهيكل يقدم عطايا وانا كنت لوحدى ومش معايا طفل لحد دلوقت وقولت لنفسى انا دلوقت كبرت فى السن ومش معايا اطفال وخلاص كنا نتمنى المسيا يجى من نسلنا بطفل لكن الرب مش اراد عشان كدا كنت زعلان خالص ان معندناش اطفال
حنة : ايوه صح كل ام دلوقت تتمنى ان المسيا يجى من نسلها عشان تتبارك بيه وتبقى مبسوطة خالص خالص
بس هنعمل ايه يا يواقيم يمكن الرب شايف لينا حاجه تانى احنا مش هنعرفها متقلقش ربنا شايف الخير لينا دايما بس لازم نبقى واثقين كدا ومش نقلق خالص
يواقيم : عندك حق يا حنة لازم نصلى ونقول لربنا لتكن مشيئتك احنا منعرفش يمكن ربنا شايف حاجه تانى لينا
حنة : طيب يلا عشان ترتاح شويه يا يواقيم عشان انت لسه جاى من مشوار بعيد ومتزعلش احنا نصلى وربنا يختار الصالح لينا
يواقيم : عندك حق هدخل الاوضه بتاعتى هرتاح شويه يلا سلام
يخرج يواقيم وحنة ثم يدخل يواقيم لوحده يصلى
يواقيم : يارب احنا ملناش غيرك يا الهنا نشكرك عل كل حاجه فى حياتنا احنا معندناش اولاد ولا اى حاجه وكنت اتمنى يبقى عندى اطفال ولكن لتكن مشيئتك يارب لتكن مشيئتك
ينام يواقيم ثم يظهر نور شديد ويسمع صوت
الملاك : لا تخف يا يواقيم الرب الهك سمع صلاتك وصلاتك امراتك حنة وسوف تلد ابنة مباركة تسميها مريم ويكون لها الطوبة ومن نسلها يكون خلاص ادم وذريته وها انا قد بشرتك بهذا لا تخف لا تخف
يواقيم : ياااه ده حلم ولا حقيقه ده حلم ولا ايه لازم اروح اشوف حنة واحكيلها على اللى حصل
يواقيم: يا حنة ياحنة
حنة : ايوه يا يواقيم انا هنا
يواقيم: شوفتى اللى انا شوفته انا جالى الملاك وانا نايم وقالى اننا هنجيب بنت مباركة وحلوه خالص
حنة: ايوه صح انا كمان جالى نفس الملاك فى الحلم وقالى نفس الكلام واننا هنجيب ابنة مباركة اسمها مريم وهتبقى حلوه خالص وهتبقى احسن واحدة
يواقيم : لازم نشكر الرب على كل الخير اللى بيقدمه لينا واحنا عايشين حتى لو حاجه بسيطة اشكرك يارب اشكرك يارب اشكرك يارب
يخرج يواقيم وحنة ثم يدخل يواقيم ومع حنة طفلة صغيره ويدخل بعض الأشخاص زكريا الكاهن وامراته اليصابات ليباركوا لهم
زكريا الكاهن: الف مبروك يا يواقيم على العطية المباركة دى ربنا استجاب لصلاوتكم وعطاكم بنت حلوه خالص واليصابات جات معايا تبارك ليكم
اليصابات : الف مبروك يا حنة بنت حلوه خالص خالص اسمها ايه بقى هيبقى
حنة : الله يبارك فيكى يا اليصابات عقبال ما ربنا يعطيكى نسل وتفرحى كدا واحنا هنسميها مريم
يواقيم : اتفضل يا ابونا زكريا ارتاح تعبناكم معانا عقبال ما ربنا يعطيكم نسل قريب
زكريا : لتكن ارادة الله يا يواقيم ربنا يختار الصالح فى الوقت المناسب احنا بنصلى ونقول لتكن ارداة الله
يواقيم : ايوه طبعا لتكن ارادة الله فى الوقت المناسب هيختار الصالح احنا واثقين من كدا اكيد واحنا انشاء الرب هنقدمها للهيكل اما تكبر شويه وتفضل تخدم هناك طول حياتها عشان احنا قولنا لربنا كدا واكيد هتبقى فرحانه خالص بكدا وهتقعد علطلول هناك تصلى وتصوم وتخدم فى بيت ربنا علطلول
زكريا الكاهن : اكيد بيت ربنا بركة وطالما قولت لربنا حاجه زى كدا اكيد ربنا هيقبلها منك ويبقى فرحان وهى هتخدم ربنا بكل امانة فى بيته وتحفظ مزامير ابينا داود النبى هناك وهتبقى كويسه خالص متقلقش عليها
زكريا الكاهن : يلا هنمشى دلوقت عشان اتاخرنا يا يواقيم ربنا يفرحكم بيها يلا سلام
اليصابات : سلام يا حنة
يخرج الجميع ويدخل يواقيم وحنة ويصلوا
يواقيم : أشكرك يارب الهنا على عطياك انك اعطيتنا نسل مبارك كدا واحنا هنقدمها للهيكل عشان تقعد هناك وتصلى دايما وتبقى بنت كويسه خالص ونفرح بيها وعطياك يارب كتيره خالص واكيد هى هتكون فى بيتك فى الهيكل مطيعة وكويسه وهتتعلم تصلى وتصوم وتعمل كل حاجه اشكرك يارب اشكرك يارب ....

   

فى نهاية الاسكتش واالقصة يتم اسئلة المخدوم ببعض الاسئلة الهادفة عن القصة والتى كانت تدور عليها القصة وهما ابوين القديسة العذراء مريم ومن هو الكاهن الذى حضر الى بيتهم ؟ وما هى اسم اخت القديسة العذراء مريم ؟

ان كل شئ فى حياتنا الا هو بركة من الرب علينا الشكر عليها وعلينا ان نقدم الطاعة له ولا نطلب من الرب الطلبة ونريد ان يحققها لنا فى نفس الوقت ونفس اليوم بل علينا ان ننتظر الرد وفى الاخر نقول لتكن ارادة الرب كما رأينا فى القصة والتى عندما اراد الله جاء فى الوقت المناسب الرب يباركم